Sot, në Komunën e Zveçanit u mbajt një takim zyrtar me delegacionin e Misionit të OSBE-së në Kosovë, të përbërë nga Nikolaos Kavalaris Ladis, drejtor i Qendrës Rajonale të Mitrovicës, Caleb Waugh, zyrtar për raportim politik, dhe Kelly Ann Murdock, zyrtare e lartë për demokratizim.
Delegacioni u prit nga kryetari i Komunës së Zveçanit, Dr. Dragiša Milović, i shoqëruar nga shefi i kabinetit, Nenad Radovanović.
Gjatë takimit, kryetari Milović i informoi përfaqësuesit e OSBE-së për sfidat kryesore me të cilat po përballet Komuna e Zveçanit, me theks të veçantë në çështjet që lidhen me përdorimin e mjeteve buxhetore, si dhe për ankesat e qytetarëve lidhur me cenimin e të drejtave të tyre demokratike dhe civile.
Në takim u diskutua gjithashtu për rëndësinë e vazhdimit dhe përfundimit të projekteve zhvillimore, me fokus të veçantë te kompleksi “Rajska Banja” në Banjskë, i cili konsiderohet një nga potencialet më të mëdha zhvillimore të komunës. U theksua se kompleksi aktualisht nuk është funksional, ndërsa prania e vazhdueshme e forcave policore në atë zonë pengon vënien e tij në shërbim të zhvillimit ekonomik dhe të komunitetit lokal.
Po ashtu, pjesë e diskutimeve ishin edhe vështirësitë me të cilat përballen qytetarët gjatë pajisjes me dokumente të Republikës së Kosovës, si pasojë e interpretimeve të ndryshme të dispozitave ligjore dhe rasteve kur institucionet kompetente refuzojnë lëshimin e lejeve të qëndrimit për personat që i plotësojnë kushtet e parapara me ligj.
Komuna e Zveçanit mbetet e përkushtuar që edhe në të ardhmen të punojë me përgjegjësi në interes të të gjithë qytetarëve të saj, duke promovuar paqen, stabilitetin, besimin e ndërsjellë dhe respektimin e të drejtave të të gjitha komuniteteve.
