Sot, Komunën e Zveçanit e vizitoi e ngarkuara me Punë e Shteteve të Bashkuara të Amerikës në Kosovë, znj. Ana Pratipati. Delegacioni u prit nga kryetari i Komunës së Zveçanit, dr. Dragiša Milović, së bashku me nënkryetarin Ivan Todosijević, kryesuesin e Kuvendit Komunal, Srđan Milisavljević, si dhe shefin e kabinetit, Nenad Radovanović.
Gjatë takimit, kryetari Milović prezantoi situatën aktuale në komunë, duke vënë në pah sfidat me të cilat përballet administrata komunale dhe qytetarët. Në veçanti, ai theksoi vështirësitë në shfrytëzimin e mjeteve buxhetore, mungesën e kuadrit profesional, si dhe nevojën për investime në përmirësimin e infrastrukturës komunale.
Një pjesë e rëndësishme e diskutimit iu kushtua edhe vështirësive me të cilat përballen qytetarët gjatë pajisjes me dokumente të Republikës së Kosovës, veçanërisht në procesin e fitimit të shtetësisë.
Gjatë takimit u diskutua gjithashtu për mundësitë e mbështetjes në realizimin e projekteve kapitale me rëndësi për zhvillimin e komunës dhe krijimin e vendeve të reja të punës për të rinjtë, ndër të cilat projektet “Rajska Banja”, “Qendra Rinore” dhe “Garazhi i Trepçës”.
Në përfundim të takimit, bashkëbiseduesit shprehën gatishmërinë për vazhdimin e bashkëpunimit dhe dialogut konstruktiv, me synim adresimin e çështjeve me interes për qytetarët e Komunës së Zveçanit.
Komuna e Zveçanit shpreh mirënjohjen për vizitën e znj. Ana Pratipati dhe për gatishmërinë e saj për të mbështetur bashkëpunimin në të mirë të zhvillimit të komunës dhe mirëqenies së qytetarëve.
